今年因為英超嘅關係，小弟又重回now嘅懷抱， 嘩佢個sport channel竟然有超過20個台，仲要乜「士仆」都有。
有英超啦，有西甲啦，田徑，揽球，桌球，羽毛球，網球，單車，甚至連賽艇都有，根本就令人眼界大開！！真係不得不like!
從來都係阿仙奴球，起初係因為腳法同組織秀麗， 慢慢地欣賞領隊雲加嘅領導能力，更敬重佢低買高賣嘅轉會政策， 以及利用新秀補充人員， 感覺好有希望同陽光。
可惜8年冇一個錦標，根本不可妄稱自己係爭標份子， 而且管理層好似極滿足於聯賽前4而有機會打歐聯賽事，更有連續幾年將該隊隊長賣走，甚至係賣俾自己競爭對手。
好喇，當本年季票開始賣時， 雲老闆宣稱自己擁有$7000萬鎊轉會費， 到現在呢？ 只係 free transfer一個法國後生仔,並與各大名球員掛上關係， 包括希古茵，蘇亞雷斯，古斯達禾，朗尼.......
然後呢？ 好大可能乜人都冇， 又或者緊急買一d二線球員回來， 再跌跌撞撞打一季，博多一次第4, 夏天開賣季票又吹大個 budget, loop多幾次， 夠時間退休，再同各位bye bye......
精明嘅算死草偶然出現會有好精明嘅感覺，但持續不變的話，只會俾人覺得弧寒。 云加， 請快點下台，放過球隊！
執筆時，正值三號波，有名嘅「李氏力牆」開動中！ 所以應該唔會有更高風球。
會唔開心嗎？唔會啦！又唔係十八廿二，唔通仲貪果一天半日假咩！
而且落波之後返工，變得比平日更艱難，又要通知同事幾點返到......幾百樣野！
雖然......我好喜歡睇人被雨dup到變落湯雞。
呢期常常有人冒認碼頭機場貨櫃業漁民等等出左schedule俾大家趁約人去happy!
講起Van仔，早排睇症個高登故仔， 真係他媽的寫得好，除左個結局有d問題外，成個故仔無論布局，氣氛同人設都睇得我津津入味，夠哂地道。
因為聽說陳果會拍成電影，所以一口氣用左一晚睇，好多場口真係嚇到瀨尿！
網上全集:
https://docs.google.com/document/d/1sakbP87NfgwgXAZoDcJ0Y2VmlQCJns41ALsS2b67G2s/mobilebasic?pli=1
家住嘅地方，由於位處偏僻，所以出入都要坐紅綠van接駁。
唔知幾時開始，總有d賤人係只願坐喺走廊旁，入面個位就死唔願坐。 冇錯，可能佢好快落車，但佢知唔知被佢逼坐入面果個會係早定遲過佢落呢？
今時今日，香港落得如此不上不落嘅境地，唔多唔少都係因為呢種看似聰明其實自私嘅性格所累。
願政府立法，將此等羚羊雙腳切除！
呢排忙於與阿妹準備我媽同外母的「秋季大遊行」, 為左玩得高興, 決定係自己行。
已經預料同兩媽之行大家興趣未必會一樣，可能我地有興趣名牌，遊戲，而佢地就會喜歡山山水水，但係.....可能為人子女，一世人可以同相親去玩嘅時間真係十隻手都數得哂，希望趁佢地未係老時, 可以一同外遊, 分享人生, 分享世界。
很期待！
近年在西環工作，因為該處華洋共處好多年，好多鬼佬都聚居果邊，加上該區又係舊區，大廈冇管得咁嚴，周圍好多街坊都養狗仔。
但有一個現象好有趣，通常本地人養果d，都係什麼明種狗，冇乜雜種狗，而鬼佬果 d呢，就往往養唐狗。
咁究竟唐狗明唔明英文？而番狗又識唔識廣東話呢？
昨天，已經係第三個人打來，問我有冇興趣轉同一份工。
說真的，人工係不錯，有20%加幅，但長久嗎？辛苦嗎？有冇難道？
人，有邊個唔想揾多d？又有邊個唔想做少d？再加上發揮自己能力？但世事往往沒有完美只有遺憾。
我估推薦果份工應該由零開始建立一個隊伍一個部門，問題係但又唔可以在我做緊嘅隊伍中挖人(道義問題)，變相由打雜到決策都要樣樣做，不斷加人不斷train人，自己不禁一問，我做到嗎？
可能真係做多左幾年野，個人保守左，又安定左，唔想下下博到盡，加上現在在自己公司嘅地位同待遇都不算差，博一博可能收穫仲少左，咁又何苦？
曾看心理學的書，講到夢係內心嘅投射， 本坐做人都三十幾年，發過嘅夢多如繁星， 但每當果一排壓力大到爆煲時 都會發到同一種夢..........
就係考試，仲要係考A-level。
明明夢入面記得自己已讀完大學，問自己做乜仲考AL，答唔到，但都要面對。一入到試場，當然腦內一片空白，不斷諗諗諗，自己應該唔駛考試，點解仲要受呢種罪？
A-level 果一期嘅考試，真係咁多年來最最最不安嘅一段日子，生活放任，為情所困，自己都唔知為乜生活，好似背負好多野 但一直都冇一個出口。
點解突然回憶呢個夢？因為我好耐都冇發過喇，可能係生活安穩左，又或者從前已經離我太遠，現在只係每日每月每年重複過日子，。
