94 - 學友光年世界巡迴演唱會

上星期去左睇學友光年世界巡迴演唱會, 其實喜歡聽張學友已好耐喇, 記得第一隻正版cd都係張學友的, 在我來講佢既歌聲係可以用極好聽來形容.

不過近年佢開始低調左好多, 而以前我讀書時又冇乜錢去睇佢演唱會, 所以我成日同自己講要在佢退休前睇佢現場表演,(可惜, 而家個個歌手為左搵錢都唔會退休.....), 終於今年1月25日佢又在香港巡迴演唱, 知道之後當然買飛睇啦.

當日落左成日雨, 個show就在西九個空地, 我都估佢開唔開得成, 哈!佢開show之前又好天喎, 真係感謝阿拉真主! 但原來主辦單位仲絕, 位位入場都派便利雨衣, 即係:話之你落狗屎!! 而佢個場地又想好似紅館咁個個坐定睇, 可惜個觀眾台斜度唔夠, 個個頭遮頭, 好在我就坐最後排 , 所以企起身睇都得!

入場之前我估:[無論佢唱乜歌我都應該識啦, 話哂都聽左佢d歌成十九幾年], 但結果真係唔識唱, 因為冷門都不得了. d歌有一半係冷門, 又有d係國語冷門, 總之high不起來啦!

加上好似冇乜采排咁, rundown亂一亂, 果然係第一場! 原本張學友話會唱好多舊歌又係冇, 話有煙花又得少少, 連佢自己都唱錯歌詞同走音~~ 最頂引係佢個巡迴演唱要加part 音樂劇, 但雪狼湖d歌係國語版, 大部分人走左去廁所.......

總個來講, 佢唱歌都仲係好好聽, 不過個演唱會就比較差喇, 尤其係佢幾廿歲人仲跳來跳去, 我睇都辛苦! 冇錯你老哥仲係好有活力, 但我諗入場觀眾都係想聽你唱歌多過跳舞. 而且佢個演唱mode都係比較80-90年代, 一定要跳舞啦煙花啦, 開合舞台啦, 同埋唔知做乜的[安歌]!! 其實我想睇的係你加一隊live band姐.