129 - 出雙糧

新一年財政預算又出龍, 偉大的政府著墨拯救窮苦大眾, 一藍子救援政策跟尾。 本來政府的存在, 除左維持社會之外, 平衡社會資源都係職責之一, 本人非常之同意, 因此「邊個唔掂救邊個」係天經地義。

但我唔同意一班競爭力比較低的人仕, 已經長期受社會補貼, 雖然不多, 但每個月確確實實已經有一個安穩收入, 佢地仲可以得到「雙糧」----呢個一眾打工仔遺忘好多年的幸福待遇。 咁我等一眾日出而作日入而作的忘命打工仔, 每日之辛勞目的係為何? 為了沒有雙糧而被老闆渣乾之快感? 定係因為我地唔夠綜援不幸?

當然當事人(一眾縱援人仕)未必係要求此特別福利之人, 我估極大機會係D 「政治家」同「成功爭取3秒綠燈」的政黨合力炮製出來的把戲, 因為德政可換到選票! 但佢地的福利真係唔可以代表全香港人, 至少在職貧窮的人不同意, 至少交稅的不同意, 至少我不同意!!

但, 成件事最奇怪的, 是好年又要派福利 (2007-2008 市道大旺), 流年又要派(2008-2009 金暴), 咁幾時唔駛派? 定抑或老馮派? 我承認有某一些人攞綜援係好悲慘, 可以用人間悲劇來形容。但其他大懶虫呢? 有手有腳, 心智正常, 你不是老弱傷殘, 為何不自己工作, 仲要生埋一大堆, 之後永世襲封, 月月有糧出, 世界應該是如此嗎?